Kreu i Organizatës Ndërkombëtare Detare (IMO), institucioni që përfaqëson detarët në mbarë botën, ka dënuar të mërkurën “sulmet e reja të pamatura” ndaj anijeve që tentonin të kalonin nëpër Ngushticën e Hormuzit në fillim të kësaj jave.
“Pendohem që edhe një herë jam i detyruar të reagoj pas sulmeve ndaj anijeve tregtare dhe detarëve të pafajshëm, për shkak të rrethanave gjeopolitike jashtë kontrollit të tyre”, deklaroi sekretari i përgjithshëm i IMO-s, Arsenio Dominguez, në një reagim të mërkurën.
“Dënoj sulmet e ditëve të fundit ndaj disa anijeve që po kalonin nëpër Ngushticën e Hormuzit”, shtoi ai.
Dominguez u bëri thirrje të dyja palëve që të tregojnë “përmbajtje maksimale” dhe të ndërmarrin hapa për “uljen e menjëhershme të tensioneve”, në mënyrë që të mundësohet “largimi i sigurt i anijeve që ende kanë mbetur të bllokuara në Gjirin Persik që prej fillimit të krizës”.
Sipas zyrtarëve amerikanë, Irani ka qëlluar me raketa ndaj tre anijeve tregtare në ujërat territoriale të Omanit, pranë Ngushticës së Hormuzit. Sulmet bënë që presidenti amerikan Donald Trump të deklaronte të mërkurën se armëpushimi mes SHBA-ve dhe Iranit është “i përfunduar”.
“Është humbje kohe të merresh me ta”, tha Trump gjatë samitit të NATO-s në Turqi.
Kreu i IMO-s u kërkoi pronarëve dhe operatorëve të anijeve të ndalojnë përkohësisht kalimet përmes ngushticës, për të shmangur rrezikun e sulmeve.
Përpara sulmeve të fundit të kësaj jave, lëvizjet detare në këtë zonë kishin nisur të rriteshin gradualisht. “Këto sulme të pamatura i kanë vendosur sërish detarët e pafajshëm në rrezik serioz. Asnjë detar nuk duhet të rrezikojë jetën e tij thjesht për të kryer punën e vet”, tha Dominguez.
Ai shtoi se, për sa kohë që siguria e ekuipazheve nuk mund të garantohet, shtetet e flamurit, pronarët e anijeve, operatorët dhe autoritetet përkatëse duhet të shmangin ekspozimin e detarëve ndaj rreziqeve të panevojshme duke kaluar përmes Ngushticës së Hormuzit.
Sipas Dominguez, rreth 6 mijë detarë vijojnë të mbeten të bllokuar në anijet e tyre në Gjirin Persik.
“Këto sulme kanë shtuar më tej frikën, pasigurinë dhe presionin psikologjik që po përjetojnë afro 6 mijë detarët”, u shpreh ai.
