Mbledhja e radhës e Këshillit të Ministrave, sapo ka përfunduar ku në fokus kanë qenë reformat në shërbimet financiare dhe marrëveshjet e pensioneve për shqiptarët të cilët jashtë vendit. Në lidhje me këtë, Ministri i Financave, Petrit Malaj u shpreh se janë propozuar ndryshime në tre ligje që lidhen me shërbimet financiare. Sipas tij këto ndryshime janë në kuadër të plotë të harmonizimit të kuadrit ligjor dhe që i shërbejnë negociatave që lidhet me lëvizjen e lirë të kapitalit.
Ministri i Financave, Petrit Malaj: Kemi propozuar ndryshime për ligjin e sistemit të pagesave, shërbimit të pagesave dhe ndryshime për bankat. Këto ligje kanë si qëllim modernizimin e sistemit aktual dhe janë në funksion të përafrimit të kuadrit ligjor me BE. Këto ndryshime i shërbejnë edhe kuadrit të negociatave që lidhet me lëvizjen e lirë të kapitalit. Ndryshimet e propozuara sjellin benefite për qytetarët, reduktim të kostove në transaksionet financiare, mbrojtje të konsumatorëve, nxit konkurrencën dhe efikasitetin.
Ndërsa, Ministrja e Ekonomisë dhe Inovacionit, Delina Ibrahimaj, deklaroi se pas marrëveshjes me Italinë, qeveria po negocion edhe katër marrëveshje të reja pensionesh që do të nisen së shpejti për firmosje. Sipas një marrëveshjeje të re vitet e kontributeve të sigurimeve shoqërore do të njihen edhe nga Polonia.
Ministria e Ekonomisë dhe Inovacionit, Delina Ibrahimaj: Ka qenë një problem i cili ndër vite është mbartur. Ne gjatë viteve kemi ratifikuar marrëveshjen me Italinë, pasi numri i shqiptarëve është shumë i lartë. Janë katër marrëveshje të tjera që duhen negociuar për pensionet, shumë shpejt ne do i sjellim në Këshillin e Ministrave për t’i firmosur. Ministria e Ekonomisë dhe Inovacionit kaloi një projektvendim për sigurimet shoqërore me Poloninë, e çon numrin e marrëveshjeve të nënshkruara në 17 Kjo është thelbësore në mbrojtjen e të drejtave të punës dhe pagesave që çdo individ mund të marrë si pagesë për kryerjen e disa viteve të punës në Shqipëri dhe në në vend tjetër.
