Komisioneri Shtetëror i Zgjedhjeve pritet të enjten të shqyrtojë një projektvendim që lidhet me auditimin e fondeve të përfituara dhe të shpenzuara nga subjektet zgjedhore pjesëmarrëse në zgjedhjet e 11 Majit 2025.

Sipas dokumentit janë konstatuar shkelje në raportimin financiar të një sërë partish politike dhe kandidatëve të listave shumemërore, për të cilët propozohet marrja e masave administrative nga Komisioni i Ankimimeve dhe Sanksioneve.

Për Partitë Politike që nuk dorëzuan Raport Financiar është propozuar gjobë në vlerën 100,000 deri në 200,000 lekë sipas nenit 173, pika 1 të Kodit Zgjedhor: Partia Bashkimi Liberal Demokrat (BLD), Partia Rruga e Vërtetë Shqiptare (P.R.V.SH), Partia Aleanca Arbnore Kombëtare (AAK), Partia Bashkimi Popullor i Pensionistëve Shqiptar (PBPPSH).

Për partitë me parregullsi të tjera financiareështë propozuar gjobë në vlerën 100,000 deri në 200,000 lekë sipas neni 173/1: Partia Balli Kombëtar (P.B.K), u konstatua se ushtronte aktivitet me NIPT pasiv, nuk kreu transaksionet përmes llogarisë së posaçme dhe paraqiti shpenzime pa dokumentacion mbështetës.

Partia Fryma e Re Demokratike (FRD) u konstatua mungesë dokumentesh mbështetëse, mospërputhje në totalet e raportit dhe shpenzime të pajustifikuara.

Partia Bashkimi për të Drejtat e Njeriut (PBDNJ) u konstatua mosdeklarim i transfertave bankare (1.5 mln lekë) dhe diferenca të pa-rakorduara në llogarinë e posaçme.

Partia Lëvizja Shqipëria Bëhet (SHB) u konstatua mos-hapje e llogarisë së posaçme bankare dhe mospërputhje midis të ardhurave dhe shpenzimeve të deklaruara.

Partia Djathtas 1912 u konstatua mosraportim i vlerave të vetëfinancimit nga kandidatët (mbi 1.2 mln lekë) dhe shpenzime pa fatura fiskale.

Partia Republikane (PR): Pasaktësi në raportim, mangësi dokumentacioni dhe kryerje shpenzimesh nga llogaria qendrore në vend të asaj të posaçme.

Partia Socialdemokrate (PSD): Përdorim i faturave pa NIPT-in e partisë dhe mosraportim i qirave të zyrave elektorale (rreth 760 mijë lekë)

Partia Nisma Thurje: Mungesë e llogarisë së posaçme dhe gabime të rënda aritmetike (dublim i shpenzimeve/të ardhurave për rreth 1.7 mln lekë)

Për Koalicionin Euroatlantik (KEA) propozohet gjobë 2,000,000 deri në 3,000,000 lekë. Shkak është keqpërdorimi i llogarisë së posaçme, ku përveç transaksioneve të fushatës, janë kryer edhe pagesa për aktivitetin e përditshëm të partisë sipas nenit 173, pika 2.

Për partitë ku kandidatët nuk dorëzuan raporte individuale propozohet gjobë 500,000 deri në 1,000,000 lekë sipas nenit 173, pika 3: Partia Lëvizja Atdheu (LA): 186 kandidatë nuk dorëzuan raport. Partia Aleanca Kombëtare Shqiptare (AKSH): 186 kandidatë pa raport.

Partia Aleanca Demokracia e Re (ADR): 186 kandidatë pa raport. Partia Aleanca Konservatore për Shqipërinë (AKPSH): 1 kandidat pa raport

Audituesit konstatuan shkelje direkte nga kandidatët e listave shumemërore: Për mosrespektim të formateve të standardizuara të raportimit propozohet gjobë 500,000 – 1,000,000 lekë:

Nga Partia Republikane: Kristiano Koçibelli, Suzana Rama, Mario Runa, Qani Xhafa, Valbona Doko, Albi Jahelezi. Nga Balli Kombëtar Demokrat: Alma Kore, Arjan Hoxha, Besart Xhaferri. Nga PBDNJ: Petraq Gjukuria.

Për pranim të fondeve nga donatorë të ndaluar: Skënder Muço (PDIU): Propozohet kthimi i fondit të marrë prej 1,113,791 lekë në llogarinë e KQZ-së dhe gjobë sa dyfishi i kësaj shume, pra 2,227,582 lekë (neni 173, pika 6).