Rusia po ecën drejt një “partneriteti të plotë” me talebanët, të cilët janë në pushtet në Afganistan dhe po inkurajon vendet e tjera në rajon të zgjerojnë bashkëpunimin e tyre me Kabulin, tha një zyrtar rus i sigurisë.
Vitin e kaluar, Rusia u bë vendi i parë që njohu zyrtarisht qeverinë islamike të talebanëve që mori pushtetin në gusht 2021, ndërsa forcat e udhëhequra nga SHBA-të po tërhiqeshin nga Afganistani në kaos pas 20 vitesh lufte.
Agjencia e lajmeve Interfax raportoi një deklaratë të zyrtarit rus Sergei Shoigu, sipas të cilit bashkëpunimi me Kabulin është i rëndësishëm për sigurinë dhe zhvillimin e rajonit.
Shoigu, i cili është sekretar i Këshillit të Sigurisë Ruse, tha se Moska po ndërton një “dialog realist” me talebanët, duke mbuluar sigurinë, tregtinë, kulturën dhe mbështetjen humanitare.
Ai i bëri këto komente në një takim me homologët e tij nga Organizata e Bashkëpunimit të Shangait (SCO), e cila ka dhjetë anëtarë, përfshirë Kinën, Indinë, Iranin, Pakistanin dhe një numër ish-shtetesh sovjetike.
“SCO duhet të ringjallë grupin e saj të kontaktit me Afganistanin”, shtoi Shoigu.
Në vitin 2003, Rusia zyrtarisht i caktoi talebanët një organizatë terroriste, por ky përcaktim u hoq në prill të vitit 2025.
Rusia e sheh të nevojshme të bashkëpunojë me Kabulin, pasi përballet me një kërcënim të madh sigurie nga grupet e armatosura islamike me bazë në vende të ndryshme – nga Afganistani në Lindjen e Mesme.
Dhe këtë herë Rusia po rikthehet në Afganistan si një mike dhe jo armike, pas luftës që zgjati një dekadë në vitet 90-të, ku ish-Bashkimi Sovjetik pësoi humbje të mëdha.
Lufta Sovjetike-Afgane u zhvillua në Afganistan, nga dhjetori 1979 deri në shkurt 1989. Duke shënuar fillimin e konfliktit 47-vjeçar afgan, ajo pa Bashkimin Sovjetik dhe ushtrinë afgane të luftonin kundër muxhahedinëve rebelë afganë, të ndihmuar nga Pakistani.
Ndërsa ata mbështeteshin nga vende dhe organizata të ndryshme, shumica e mbështetjes së muxhahedinëve erdhi nga Pakistani, Shtetet e Bashkuara (si pjesë e Operacionit Cikloni ), Mbretëria e Bashkuar, Kina, Irani dhe shtetet arabe të Gjirit Persik, përveç një fluksi të madh luftëtarësh të huaj të njohur si Arabët Afganë.
Luftimet u zhvilluan gjatë viteve 1980, kryesisht në fshatrat afgane, pasi shumica e qyteteve të vendit mbetën nën kontrollin sovjetik. Konflikti rezultoi në vdekjen e një deri në tre milionë afganëve, ndërsa miliona të tjerë ikën nga vendi si refugjatë. Në fund edhe Bashkimi Sovjetik e humbi luftën, duke u larguar nga vendi.
