Forcat Ajrore Amerikane kanë kryer një operacion shpëtimi dramatik të 11 personave që kishin mbetur të bllokuar në mes të Oqeanit Atlantik në brigjet lindore të Floridës, pasi një aeroplan u përplas të oqean.
Më konkretisht, sipas informacionit nga BBC, gjatë një fluturimi rutinë 20-minutësh midis dy ishujve në Bahamas, aeroplani pësoi defekte të njëpasnjëshme, së pari sistemi i navigimit dështoi, pastaj radioja, pastaj njëri motor dhe së fundmi tjetri. Ai po udhëtonte nga Marsh Harbour, në Ishujt Abaco të Bahamas, drejt Freeport, në Grand Bahama.
“Për njëfarë kohe nuk munda të lidhesha me askënd në radio. U përpoqa të telefonoja Freeport, Bahamas, u përpoqa të telefonoja radion e Miamit. Nuk e di nëse më dëgjuan, por nuk mora përgjigje”, tha piloti i aeroplanit, Ian Nixon, për CBS News.
I paaftë për të gjetur një vend të sigurt për ulje, piloti nga Bahama vendosi ta linte aeroplanin në oqean rreth 289 km në veri të Miamit, një veprim i minutës së fundit i bërë kur nuk kishte mundësi të tjera.
“Sapo rashë në ujë, mendimi im i parë ishte: ‘ Nuk jemi të vdekur. Nuk njoh askënd që ka mbijetuar duke mbetur i bllokuar në oqean”, tha Nixon.
Njësia ishte në një mision stërvitjeje kur ndryshoi itinerarin për të ndihmuar në operacionin e kërkim-shpëtimit pas një sinjali emergjence për një situatë të mundshme fatkeqësie.
“Ata kishin qenë tashmë në gomone për rreth pesë orë. Vetëm duke i parë, mund të kuptoje se ishin në rrezik, fizikisht, mendërisht dhe emocionalisht”, tha Kapiteni Rory Whipple. Ndërkohë, autoritetet po hetojnë shkakun e rrëzimit.
