Dy burra, përfshirë një anëtar të Forcës Kufitare Britanike, u shpallën fajtorë nga një gjykatë në Londër për spiunazh ndaj disidentëve pro-demokracisë nga Hong Kongu, që jetonin në Britani në emër të Kinës, në atë që Pekini e quajti një “manipulim të procedurave gjyqësore”.

Chang Bie Bill Yuen, 65 vjeç, dhe Chi Leung Peter Wai, 40 vjeç, një anëtar i Forcës Kufitare Britanike, u dënuan për ndihmë ndaj një shërbimi të inteligjencës së huaj duke kryer operacione mbikëqyrjeje nga dhjetori 2023 deri në maj 2024. Masa e këtij dënimi do përcaktohet më vonë nga gjyqtari i dosjes.

Bill Yuen është një ish-oficer i lartë i policisë së Hong Kongut, në pension, i cili ka punuar në zyrën zyrtare të përfaqësimit tregtar të qeverisë së Hong Kongut në Londër. Peter Wai ishte oficer policie në Policinë Metropolitane të Londrës dhe gjithashtu ka punuar për Shërbimin Kufitar Britanik.

Dy burrat, të cilët kanë shtetësi të dyfishtë britanike dhe kineze, kanë deklaruar se nuk janë fajtorë, ndërsa ambasada kineze në Londër ka akuzuar Britaninë për sajimin e akuzave kundër tyre.

Sipas mediave britanike, ata janë personat e parë në Britani që dënohen për spiunazh për Kinën. Dënimet e tyre do të shpallen më 15 maj dhe ata përballen me deri në 14 vjet burg.

Një burrë i tretë, i cili u akuzua për të njëjtat vepra penale, u gjet i vdekur pak pasi u akuzuan. Matthew Trickett, 37 vjeç, ishte ish-anëtar i Marinës Britanike dhe kishte punuar për shërbimin e imigracionit dhe si hetues privat. Vdekja e tij nuk po trajtohet si e dyshimtë.

Zëdhënësi i Ministrisë së Jashtme kineze, Lin Jian, të martën denoncoi “abuzimin e ligjit dhe manipulimin e proceseve gjyqësore për të siguruar dënime, mbështetjen e hapur për elementët armiqësorë ndaj Kinës dhe destabilizimin e Hong Kongut, si dhe akuzat dhe shpifjet e pabaza të ngritura kundër Kinës”.

Kina i bën thirrje Britanisë të “ruajë momentumin pozitiv të marrëdhënieve sino-britanike, rezultat i përpjekjeve të konsiderueshme”, tha Lin në një konferencë të rregullt informuese, duke iu referuar përmirësimit të marrëdhënieve midis dy vendeve në muajt e fundit.

Marrëdhëniet midis Britanisë dhe Kinës janë përkeqësuar që kur autoritetet kineze shtypën protestat pro-demokraci në vitin 2019 në Hong Kong, një territor që iu dorëzua Kinës gati tre dekada më parë pas 156 vjetësh sundimi britanik.

Kryeministri britanik Keir Starmer vizitoi Kinën në janar, por akuzat e përsëritura për spiunazh kanë rezultuar të jenë një pengesë për përpjekjet për të përmirësuar marrëdhëniet dypalëshe.

Pas dënimeve të djeshme, Ministri i Sigurisë i Mbretërisë së Bashkuar, Dan Jarvis, tha se Britania do të vazhdojë ta mbajë Kinën përgjegjëse për çdo veprim që vë në rrezik sigurinë e qytetarëve britanikë.

Jarvis shtoi se ambasadori kinez do të thirret për të shpjeguar çështjen e spiunazhit “për ta bërë të qartë se aktivitete të tilla ishin dhe do të jenë të papranueshme në tokën britanike”.

“Për vite me radhë, anëtarët e diasporës së Hong Kongut në Britani kanë jetuar me frikë”, tha Finn Lau, një nga aktivistët që ishte shënjestruar. “Dënimi i sotëm konfirmon se kjo frikë nuk ishte paranojake. Ishte reale”.

Në nëntor, shërbimi i sigurisë MI5 i Britanisë i paralajmëroi deputetët se agjentët kinezë po përpiqeshin të mblidhnin inteligjencë dhe të ndikonin në aktivitetet në Westminster.

Ditën që filloi gjyqi i Yuen dhe Wai në mars, policia britanike njoftoi se kishte arrestuar tre burra me dyshimin se kishin ndihmuar shërbimin kinez të inteligjencës së jashtme, përfshirë deputetin në detyrë.