Mbretëria e Bashkuar është pushtuar nga moti i keq sot, me një stuhi të fortë ere, e cila ka lënë pa energji elektrike mbi 1 milionë banorë. Siç raportojnë mediat britanike shpejtësia e erës u regjistrua mbi 160 kilometra në orë.

Ekspertët e motit e kanë quajtur këtë stuhi të furishme stuhia “Eowyn”. Era e fortë ka rrëzuar pemë, duke shkaktuar dëme në makina të parkuara dhe shtëpi. Në të njëjtën kohë, çatitë e disa ndërtesave u rrëzuan.

Mësohet se paralajmërimi i kuq për Irlandën e Veriut ka përfunduar sot pasdite, ndërsa paralajmërimet e verdha mbeten në fuqi.

Zyra e shërbimit të motit “Met” në Mbretërinë e Bashkuar tha se paralajmërimi i verdhë për Irlandën e Veriut do të qëndrojë në fuqi deri në orën 21:00 sonte (me orën lokale).

Mbi një milion konsumatorë pa energji

Ndërkohë, më shumë se një milionë banorë mbeten pa energji elektrike në të gjithë Mbretërinë e Bashkuar dhe Irlandë për shkak të stuhisë Eowyn.

Në Skoci, Irlandën Veriore dhe Republikën e Irlandës ka gjithsej 1,105,000 shtëpi, biznese dhe ferma që përjetojnë ndërprerje të gjerë të energjisë elektrike.