Të shtunën paradite në portin e Durrësit do të ankorohet kroçera “Berlin”, me 352 turistë në bord. Pjesa më e madhe e tyre (314) janë nënshtetas gjermanë, por nuk mungojnë edhe turistë nga Austria (23), Zvicra (3), si dhe Bjellorusia, Kroacia, Holanda, Norvegjia, Rusia dhe Afrika e Jugut.
Nga të dhënat e agjencisë pritëse Intermed shipping mësohet se kroçera ka nisur lundrimin e saj në Venecia më 23 mars, për të vijuar në Dubrovnik dhe Shebenik (Kroaci), Durrës (Shqipëri), Korfuz (Greqi), Bari (Itali) dhe Kotorr (Mali i Zi). Një pjesë e turistëve do të vizitojnë në mënyrë të organizuar qytetet e Krujës dhe Tiranës, ndërsa pjesa tjetër do të vizitojnë muzetë dhe monumentet arkeologjike dhe historike të Durrësit.
Kroçera “Berlin” vjen për herë të parë në portin e Durrësit dhe pritet të ankorohet në kalatën 5 rreth orës 7.30. Ajo ka një gjatësi prej 139.3 metra dhe është regjistruar në Valleta me flamur maltez. Në bordin e saj punon një personel prej 176 vetash.
Në portin e Durrësit gjatë vitit 2016 priten edhe 20 kroçera dhe së bashku me to do të ankorohen edhe disa velierë luksozë, që prej disa vitesh ndalojnë në portin më të madh të vendit tonë.
Kroçerat kanë gjatësi nga 140 në 215 metra. Pjesa dërmuese e tyre si “Berlin”, “Thomson celebration”, “Sirena”, “Explorer”, “Albatros” dhe “Seven Seas Navigator” do të lundrojnë për herë të parë drejt Durrësit, duke kryer 18 nga 22 lundrimet.
Megjithëse Durrësi është një port përpunimi mallrash, vazhdimisht Autoriteti Portual ka marrë të gjitha masat për ankorimin e kroçerave në kalatat qendrore 4 dhe 5, si dhe për lehtësimin e lëvizjes së turistëve në hapësirën portuale gjatë qëndrimit prej 10-14 orë në Durrës.
