Mimi Kodheli është nga të paktat kandidate jashtë zonës së sigurt në listën e PS-së, që ka mbështetjen e Erion Veliajt dhe ditët e fundit ka siguruar disa takime, të cilat transmetohen live në profilin Facebook të kryebashkiakut. E renditur në vendin e 23-të në listë, Kodhelit mendohet se i duhen 10 apo 12 mijë vota për të dalë deputete.
Kodheli ka thënë se i konsideron socialistët e lagjes 13 edhe më shumë se njerëzit e saj të gjakut, duke i kërkuar të njëjtën gjë atyre deri ditën e zgjedhjeve.
“Besomëni, ju që jeni këtu prezent, bëni për familjen tonë të përbashkët socialiste dhe për mua personalisht, atë që familjarët e mi nuk do ta bënin dot. Prandaj unë ju konsideroj më shumë se njerëzit e mi të gjakut. Besojeni këtë. Dhe për pasojë, edhe ju duhet të më konsideroni ju nesër, që nga sot e deri atë ditë në të njëjtën mënyrë” u shpreh Kodheli.
