Trupa e teatrit “Aleksandër Moisiu” Durrës mori dy trofe shumë të rëndësishëm në Takimin e III-të Teatror Mbarëkombëtar, të zhvilluar në qytetin e Gjirokastrës pak ditë më parë.
Komedia “Martesa” u shpall nga juria “Shfaqja më e mirë”, ndërkohë që aktori Amos Zaharia u shpall “Aktori jo protagonist më i mirë”.
Emocionet e pritjes mjaft të mirë që i bëri publiku, por edhe vlerësimi maksimal nga ana e jurisë janë ende të pranishme tek e gjithë trupa e aktorëve, por edhe tek i gjithë stafi mbështetës që bëjnë të mundur që “Martesa” të jetë një nga shfaqjet më të ndjekura dhe të vlerësuara 6 vite pas premierës së saj në Durrës.
Për të mësuar më shumë mbi përfaqësimin në këtë festival mbarëkombëtar të teatrit, “DurrësLajm” intervistoi regjisoren e shfaqjes, Driada Dervishi.
“Çmimi më i madh për ne ishte çmimi i publikut”,- thotë ndër të tjera Dervishi, ndërkohë që thekson se artdashësit kishin zënë radhë që në orën 5.30 për të blerë biletë.
“Kjo është një fitore e madhe e teatrit. Trupa jonë, në viitet e fundit është vlerësuar në çdo festival. Këtë nuk e them për të qenë mendjemëdhenj, por modestisht shpreh gjithë punën tonë, përkushtimin e madh që tregojmë për teatrin dhe sesi për hir të së vërtetës, megjithëse kritika mungon, duhet ta themi me të madhe që kemi një nga trupat më të mira në Shqipëri”,- tha më tej regjisorja e njohur durrsake.
Prej gjashtë vitesh komedia “Martesa” e Anton Çehov vijon të qendrojë në repertor duke u vlerësuar në këtë rrugëtim të bukur me 5 çmime të ndryshme.
Vlerësimet më të fundit duket se do ta angazhojnë të gjithë trupën në projekte të reja artistike.
“Ishte një vlerësim unanim i jurisë si për shfaqjen më të mirë, ashtu dhe për Amos Zaharia si aktori më i mirë protagonist. Çdo çmim është vlerësim, por për mua është përgjegjësi për të vijuar më tej”,– thotë ndër të tjera Dervishi.
Çmimet e komedisë “Martesa” ndër vite:
