Policia e Durrësit ka kapur orët e vona të natës 26-vjeçarin që akuzohet se vodhi me dhunë një shumë parash nga kasa e një supermarketi.
“DurrësLajm” ka siguruar foton e autorit gjatë momentit të arrestimit, rreth orës 01:00 të natës.
I riu me iniciale F.S. mbante veshur po të njëjtë bluze të kuqe, fanellë të Liverpulit.
Ngjarja ndodhi ditën e djeshme më 24 gusht, rreth orës 15:00, në lagjen nr. 17, kur 26-vjeçari ka marrë me dhunë një shumë parash nga kasa e një marketi dhe është larguar.
NJOFTIMI I POLICISË:
Kapet dhe vihet në pranga 26-vjeçari që vodhi dje, një shumë parash në kasën e një marketi.
26-vjeçari, me precedent penal për vjedhje.
Specialistët për Hetimin e Krimeve të Komisariatit të Policisë Durrës arrestuan shtetasin F. S., 26 vjeç, banues në Durrës, pasi nga hetimet dyshohet se më datë 24.08.2026, rreth orës 15:00, ka vjedhur një shumë parash në kasën e një marketi në lagjen nr. 17, Durrës.
Ky shtetas u identifikua menjëherë pas vjedhjes dhe u kap nga shërbimet e Forcës së Posaçme “Shqiponja”, disa orë pas krimit.
Materialet procedurale iu referuan Prokurorisë së Durrësit, për veprime të mëtejshme, për veprën penale “Vjedhja”.
