Shkaktoi aksident, me automjetin që drejtonte në gjendje të dehur, ndërkohë që ishte në kërkim, ndalohet 32-vjeçari në Durrës.
I ndaluari, para 3 vjetësh, lëshoi fatura fiktive te subjekti tregtar që administronte, me qëllim shmangien e TVSh-së. dhe me subjektin e tij dhe 12 të tjera shmangu detyrimin tatimor duke i shkaktuan shtetit, 300 000 000 lekë dëm. Për kë vepër penale ishte dënuar nga Gjykata e Tiranës me 2 vite burg.
“Menjëherë pas njoftimit për një aksident rrugor, në Sukth, ku një automjet ishte përplasur me disa pemë, shërbimet e Policisë Rrugore shkuan në vendngjarje, për të kryer veprimet procedurale të nevojshme. Në vijim, iu bë test alkooli, drejtuesit të automjetit, shtetasit A. D., 32 vjeç, rezultat i të cilit, herën e dyte ishte 1.29 mg/l.
Nga verifikimet e mëtejshme rezultoi se 32-vjeçari ishte aktualisht në kërkim, sepse Gjykata e Tiranës, në vitin 2024, e ka dënuar me 2 vjet burgim, për veprën penale “Krijimi i skemave të mashtrimit lidhur me tatimin mbi vlerën e shtuar”.
Në vitin 2022, ky shtetas ka administruar një subjekt, për llogari të të cilit janë lëshuar fatura fiktive, me qëllim shmangien e detyrimeve tatimore.
Nga aksidenti u dëmtua lehtë, pasagjeri në automjetin që drejtonte 32-vjeçari.
Në përfundim të veprimeve procedurale, shtetasi A. D. u vu në pranga dhe do t’i dorëzohet Policisë së Tiranës, për kryerjen e veprimeve të mëtejshme“,- njofton policia e Durrësit.
Ndërkaq, materialet procedurale iu referuan Prokurorisë.
