Pas humbjes së ngushtë ndaj Partizanit, ku Teuta u ndëshkua nga detajet dhe një gol i Artan Jazxhi nuk u vlejti, mbrojtësi durrsak flet për momentin e skuadrës, zhgënjimin nga ajo ndeshje dhe përgatitjet për duelin e radhës ndaj Vorës, që do të luhet të dielën.
Artan, si e përjetove humbjen ndaj Partizanit?
Ishte një humbje e vështirë për t’u pranuar, sepse mendoj se bëmë një ndeshje të mirë dhe meritonim më shumë. Detajet e vogla bënë diferencën dhe na ndëshkuan.
Shënuat një gol që për fat të keq nuk vlejti. Çfarë ndjetë në atë moment?
Sigurisht ishte zhgënjyese, sepse për një mbrojtës goli ka një vlerë të veçantë. Por këto janë pjesë e futbollit dhe duhet ta pranojmë vendimin e arbitrit, duke vazhduar përpara.
Si e vlerëson paraqitjen e Teutës në atë ndeshje?
Kemi treguar karakter dhe organizim të mirë, sidomos në fazën mbrojtëse. Na mungoi pak qetësia në momentet vendimtare, por ekipi është në rrugën e duhur.
Të dielën përballeni me Vorën. Çfarë ndeshjeje prisni?
Presim një ndeshje të fortë dhe të luftuar. Vora është një skuadër që nuk dorëzohet lehtë, ndaj duhet të jemi maksimalisht të përqendruar nga minuta e parë.
Çfarë duhet të bëjë Teuta për të marrë rezultat pozitiv?
Duhet të jemi kompaktë, të mos bëjmë gabime dhe të shfrytëzojmë rastet që do të krijojmë. Nëse luajmë si skuadër, kemi shanse të mira për fitore.
