Kryeministri i Sllovakisë, Robert Fico, u tha liderëve të Bashkimit Evropian javën e kaluar se ishte shqetësuar dhe i tronditur nga gjendja psikologjike e presidentit amerikan, Donald Trump, gjatë një takimi ballë për ballë në rezidencën e Trumpit në Mar‑a‑Lago, Florida, në 17 janar, sipas disa diplomatëve evropianë anonimë.
Fico, i njohur si një ndër udhëheqësit më pro‑Trump në BE, thuhet se përdori fjalën “i rrezikshëm” për të përshkruar sjelljen e presidentit gjatë takimit të tij privat. Shqetësimi i Ficos për gjendjen e Trump u shpreh në një bisedë joformale me homologët e tij evropianë më 22 janar në Bruksel, në margjinat e një samiti emergjent të Bashkimit Evropian mbi marrëdhëniet transatlantike, të cilat ishin tensionuar pas disa deklaratave dhe veprimeve të presidentit amerikan.
Ky koment ka rëndësi të veçantë, pasi Fico shpesh ka mbështetur publikisht qëndrimet e Trump dhe qasjen e tij ndaj Evropës dhe çështjeve ndërkombëtare.
Megjithatë, vetë Robert Fico e ka mohuar fuqishëm këtë version të ngjarjeve. Ai shkroi në rrjetin social X se lajmi është “i pavërtetë” dhe i shpikur, duke theksuar se askush s’ka dëgjuar apo parë diçka të tillë në takimin informal dhe se ai nuk ka folur në atë mënyrë për takimin e tij me Trumpin.
Fico tha se ai ndan shumë ide të përbashkëta politike me presidentin e SHBA-së, edhe pse ka mosmarrëveshje për disa pika, dhe se ishte befasuar që udhëtimi i tij nuk ishte anuluar pavarësisht kritikave të tij ndaj Venezuelës, çka sipas tij e bën takimin me Trump edhe më të vlefshëm për të.
Nga ana e saj, Zëdhënësja e Shtëpisë së Bardhë tha se raportimet janë të rreme, duke shtuar se takimi në Mar‑a‑Lago ishte pozitiv dhe produktiv. /Corriere Della Sera/
