Pas pauzës së kombëtares, rikthehet vëmendja te kampionati, ku Teuta përgatitet intensivisht për një transfertë mjaft të rëndësishme ndaj Vorës këtë të diel. Një sfidë që konsiderohet delikate për ecurinë e sezonit, pasi çdo pikë në këtë fazë të garës merr një peshë të veçantë për objektivat e skuadrës durrsake. Skuadra ka nisur menjëherë përgatitjet pas rikthimit nga pushimi, me stafin teknik që ka vënë theksin tek aspektet taktike dhe përmirësimi i detajeve në lojë.
Trajneri Dobi, së bashku me bashkëpunëtorët e tij, po punojnë intensivisht për të nxjerrë maksimumin nga grupi, duke analizuar kundërshtarin dhe duke përgatitur strategjinë më të mirë për këtë përballje jashtë fushe. Në seancat stërvitore të ditëve të fundit është vënë re një angazhim maksimal nga lojtarët, të cilët janë të vetëdijshëm për rëndësinë e këtij takimi. Atmosfera në skuadër duket pozitive, ndërsa fokusi është i gjithi te marrja e një rezultati pozitiv në Vorë.
Një lajm i mirë për stafin teknik është edhe rikthimi i pritshëm i disa lojtarëve që kanë qenë të angazhuar me kombëtaret e moshave. Arifi dhe Kuqi pritet t’i bashkohen grupit shumë shpejt, duke shtuar alternativat dhe konkurrencën në formacion. Prania e tyre shihet si një vlerë e shtuar për ekipin në këtë moment të rëndësishëm të sezonit. Teuta synon të shfrytëzojë këtë transfertë për të marrë maksimumin e mundshëm dhe për të vijuar rrugën drejt objektivave të saj.
