Përdorimi i shpeshtë i tharëses, hekurit apo figaros pa mbrojtje nga nxehtësia po konsiderohet si një nga arsyet kryesore që dëmton flokët gradualisht.
Edhe pse shumë persona investojnë në shampo, maska dhe produkte të shtrenjta për kujdesin ndaj flokëve, specialistët e kujdesit estetik thonë se dëmi mund të vijë nga një gabim i thjeshtë gjatë stilimit.
Temperaturat e larta ndikojnë drejtpërdrejt në strukturën e flokut, duke i hequr lagështinë natyrale dhe duke e bërë atë më të thatë, të brishtë dhe pa shkëlqim.
Pasojat më të zakonshme janë majat e çara, këputja e flokëve dhe ashpërsia në prekje.
Dëmtimi nuk shfaqet gjithmonë menjëherë, por krijohet me kalimin e kohës, sidomos te personat që përdorin çdo ditë pajisje me nxehtësi për tharje apo stilim.
Për të shmangur dëmtimin, rekomandohet përdorimi i një produkti mbrojtës nga nxehtësia para tharjes ose përdorimit të hekurit për flokë.
Ky preparat krijon një shtresë mbrojtëse dhe ndihmon në uljen e efektit të temperaturave të larta mbi flokun.
Specialistët këshillojnë gjithashtu që të mos përdoret temperaturë shumë e lartë dhe tharësja të mos mbahet shumë afër flokëve. Po ashtu, kalimi disa herë me hekur në të njëjtën pjesë të flokut mund të shtojë dëmtimin edhe më shumë.
Sipas tyre, flokët e shëndetshëm nuk varen vetëm nga produktet e kushtueshme, por edhe nga mënyra si trajtohen çdo ditë.
