Dy zyrtarë rusë në Kosovë janë shpallur non grata pasi aktiviteti i tyre është konsideruar i dëmshëm për sigurinë kombëtare të vendit.
Lajmin e bën me dije presidentja e Kosovës Vjosa Osmani, e cila shprehet se i ka kërkuar ministres së Punëve të Jashtme Donika Gërvalla-Schwarz, shpalljen si persona të padëshirueshëm të dy zyrtarëve rusë të Zyrës Ndërlidhëse të Federatës Ruse në Kosovë.
Ndërsa identiteti i dy zyrtarëve rusë të shpallur “non-grata” nuk bëhet i ditur.
Njoftimi i plotë i Osmanit:
Këtë javë kam kërkuar nga zëvendëskryeministrja, njëherësh ministre e Punëve të Jashtme dhe e Diasporës, Donika Gërvalla-Schëarz, t‘i shpallë persona non grata dy zyrtarë të Zyrës Ndërlidhëse të Federatës Ruse në Kosovë, për shkak të aktivitetit të tyre të dëmshëm, i cili ka cenuar sigurinë kombëtare dhe rendin kushtetues të Republikës së Kosovës. Sot, MPJD-ja ka nxjerrë vendimin për shpalljen e këtyre dy zyrtarëve rus persona të padëshirueshëm dhe në të njëjtën kohën i ka njoftuar institucionet ligjzbatuese dhe autoritetet përkatëse për zbatimin e tij.
Institucionet e Republikës së Kosovës janë të vendosura në luftën kundër ndikimit malinj të Federatës Ruse dhe satelitëve të saj në rajon, të cilët synojnë rrënimin e arritjeve tona dhe të SHBA-ve, NATO-s, dhe BE-së. Për këtë arsye do të vazhdojmë të bashkëpunojmë ngushtë me aleatët tanë amerikanë dhe evropianë për ta parandaluar tentimin që Kosova dhe rajoni ynë të jenë pre e ambicieve destablizuese të Federatës Ruse.
I siguroj qytetarët e vendit se institucionet e Republikës së Kosovës nuk do të hezitojnë të veprojnë çdoherë kur cenohet siguria dhe rendi kushtetues në vend.
