Hapet në Durrës Dhoma Vendore e Ndërmjetësve.
Në fjalën e rastit mbajtur para të pranishmëve zv/ministri i Drejtësisë Klajd Karameta deklaroi se hapja e kësaj zyre në qytetin bregdetar do të lehtësojë punën e gjykatave, pasi ul ndjeshëm numrin e gjyqeve.
Ndërmjetësimi është një proces jashtëgjyqësor ku një palë e tretë neutrale ndihmon palët në konflikt në gjetjen e një zgjidhjeje të përbashkët për mosmarrëveshjet e tyre, brenda kuadrit ligjor.
Për Drita Avdylin, kryetaren e Dhomës Kombëtare të Ndërmjetësve krijimi i Dhomës Vendore në Durrës është një proces mjaft i rëndësishëm.
Në qytetin bregdetar janë të licensuar 6 ndërmjetës për zgjidhjen e mosmarrëveshjeve në fushën Civile, Tregtare, etj.
Ndërmjetësit e Dhomës Vendore Durrës janë:
- Aida Zaka,
- Merita Dakavelli
- Klaudia Burgia
- Emil Premci
- Brikena Shkembi
- Enkelejd Abdyli
INFO:
Për cilat çështje mund të zbatohet/aplikohet ndërmjetësimi?
- në mosmarrëveshjet në fushën e së drejtës civile, tregtare, të punës, familjare, pronësisë intelektuale, të drejtave të konsumatorëve;
- në mosmarrëveshjet midis organeve të administratës publike dhe subjekteve private;
- mosmarrëveshjeve në fushën penale që shqyrtohen nga gjykata me kërkesën e viktimës akuzuese/ankim të të dëmtuarit ose në çështjet penale me të mitur.
Si mund të kërkoni zhvillimin e procesit të ndërmjetësimit për zgjidhjen e mosmarrëveshjeve tuaja?
Ju mund të aplikoni ndërmjetësimin për zgjidhjen e mosmarrëveshjeve tuaja vullnetarisht në dakordësi dhe me palët e tjera në proces.
Gjykata dhe Prokuroria kanë detyrimin ligjor të njoftojnë palët në proces, në fazën e seancës paraprake për mundësinë e zgjidhjes së mosmarrëveshjes me anë të ndërmjetësimit për rastet e parashikuara nga ligji.
Ju mund të zgjidhni deri në dy ndërmjetës për trajtimin e çështjes tuaj, në dakordësi dhe me palët e tjera të cilat janë pjesë e procesit.
Në rast se gjatë zhvillimit të procesit të ndërmjetësimit, ju mbeteni të pakënaqur nga shërbimi i ofruar, ju mund të drejtoni ankesë brenda 30 ditëve nga marrja dijeni për shkeljen dhe jo më vonë se dy vjet nga kryerja e shkeljes në lidhje me ndërmjetësit, duke iu drejtuar Dhomës Kombëtare të Ndërmjetësve. Organi kompetent për shqyrtimin e këtyre ankesave është Bordi Disiplinor pranë Dhomës Kombëtare të Ndërmjetësve.
Cilat janë avantazhet e zgjidhjes së ndërmjetësimit si alternativë jashtëgjyqësore për zgjidhjen e mosmarrëveshjeve?
- redukton konfliktet mes palëve duke i ofruar një zgjidhje të shpejtë dhe efektive;
- përfshin palët në procesin e zgjidhjes së mosmarrëveshjes midis tyre, duke mos iu imponuar atyre asnjë vendimarrje në lidhje me procesin;
- ka kosto të ulët;
- shmang procedurat e tejzgjatura gjyqësore;
- shmang bllokimin e çështjes në instanca më të larta;
- në rastet kur palët nuk mund të arrijnë një marrëveshje në procesin e ndërmjetësimit, ato mund t’i drejtohen gjykatës;
- individët që përfitojnë nga ndihma juridike parësore, mund të përfitojnë falas këshillim dhe informim mbi ndërmjetësimin;
- mundëson zhvillimin e procesi të ndërmjetësimit online, nëpërmjet platformave të posaçme duke shmangur takimet fizike në kuadër të masave mbrojtëse kundër pandemisë COVID-19;
- informacioni për palët dhe çështjen për të cilën ofrohet ndërmjetësim është konfidencial, dhe ndërmjetësi është i detyruar të ruajë konfidencialitetin në lidhje me procesin;
- vendimi përfundimtar në procesin e ndërmjetësimit përbën titull ekzekutiv.