DURRËS, 22 TETOR 2014 –  Presidenti i Federatës Serbe të Futbollit (FSS), Tomislav Karadzic ka thënë se Komisioni Disiplinor i UEFA-s do të vendosë drejtësinë për ndeshjen e ndërprerë mes Serbisë dhe Shqipërisë, të zhvilluar më 14 tetor në Beograd. “Kemi biseduar me presidentin e UEFA-s, Michel Platini. Ai na ka thënë se Komisioni Disiplinor të enjten do të marrë vendimin për ndëshkimet rreth incidentit dhe ndërprerjen e duelit Serbi – Shqipëri”, deklaroi Karadzic për agjencinë e lajmeve turke, “Anadolija”. “Ndërprerjen e ndeshjes e bëri fluturakja me flamur. Po të mos ishte ajo, ndeshja do të përfundonte në mënyrën më të mirë. Gjithçka u iniciua nga pala shqiptare”, u shpreh ai.