Dy persona, babë e bir, janë plagosur me thikë gjatë mbrëmjes së sotme në fshatin Larushk të Fushë-Krujës. Shefqet Stafuka, 58 vjeç dhe Alban Stafuka, 30 vjeç, janë dërguar në spital me plagë të shkaktuar nga mjetet e mprehta, në disa pjesë të trupit.
Gjendja më e rëndë për jetën paraqitet për 58-vjeçarin Shefqet Stafuka, pasi ka marrë plagë në pjesën e barkut, ndërsa i biri ndodhet jashtë rrezikut.
Të dy janë dërguar me urgjencë në Spitalin e Traumës në Tiranë.
Ngjarja e rëndë ka ndodhur në orën 21:00 , kur gjithçka ka nisur pas një konflikti të çastit me një person, i cili pasi i plagosi të dy ata, u largua nga vendi i ngjarjes.
Mësohet se Shefqet Stafuka është punonjës i ujësjellësit të Krujës, ndërsa i biri Alban Stafuka ka pak kohë që është kthyer nga Spanja.
Grupi hetimor dhe shërbimet e Policisë po punojnë për zbardhjen e ngjarjes, identifikimin dhe kapjen e autorit.
