Një çift të moshuarish kanë rënë pre e dhunës brenda banesës së tyre në zonën e Spitallës dhe për pasojë janë plagosur rëndë.
Persona të paidentifikuar kanë hyrë në shtëpinë e çiftit durrsak dhe i kanë masakruar e gjakosur. Dy të moshuarit janë gjetur të goditur në kokë nga fqinjët dhe janë dërguar në gjendje të rëndë në spital.
Pistat ku po heton policia janë dy. Nuk përjashtohet pista e grabitjes, por policia ngre pikëpyetje duke shtuar se si paratë ashtu edhe sendet prej floriri të çiftit nuk janë marrë nga grabitësit. Policia thotë se plagosja mund të ketë ardhur si pasojë e një përleshje mes tyre dhe hajdutëve, të cilët në panik e sipër janë larguar pa marrë gjë.
Nga ana tjetër nuk përjashtohet mundësia që të moshuarit të jenë bërë për spital nga ndonjë i afërm apo fqinj i tyre. Prandaj blutë e Durrësit, kanë nisur në këto momente të marrin në pyetje banorët e lagjes periferike të Durrësit, për të zbuluar nëse kishin apo jo ndonjë konflikt të moshuarit me origjinë nga Pogradeci.
Në këto momente, burrë e grua po i nënshtrohen operacionit.
