Një person ka humbur jetën dhe rreth 25 të tjerë rezultojnë të zhdukur pasi një varkë që transportonte emigrantë në mënyrë të paligjshme u fundos pjesërisht në jug të ishullit grek Gavdos, pranë Kretës, të dielën më 13 shtator.
Deri më sot, 14 shtator, 51 shtetas të huaj janë shpëtuar nga anije që ndodheshin pranë zonës, ndërsa një tjetër shtetas i huaj është gjetur pa ndjenja, bëri të ditur një zëdhënës i Rojës Bregdetare.
Sipas të mbijetuarve, në varkë ndodheshin 77 persona në momentin kur ajo u mbyt pjesërisht. Ndërkohë, vijojnë kërkimet për rreth 25 personat që rezultojnë të zhdukur.
Kreta dhe Gavdos, rreth 320 kilometra larg brigjeve të Libisë, janë kthyer në pikat kryesore të hyrjes në Greqi për azilkërkuesit.
Në fund të gushtit, agjencia greke e lajmeve ANA publikoi të dhëna nga Ministria e Migracionit, sipas të cilave numri i mbërritjeve të emigrantëve në Greqi ra nga rreth 61 mijë në vitin deri në gusht 2025, në rreth 42 mijë gjatë 12 muajve pasues, një rënie prej rreth 31 për qind.
Autoritetet në Evropë kanë ashpërsuar rregullat e emigracionit gjatë viteve të fundit, ndërsa partitë e ekstremit të djathtë dhe kundër emigracionit kanë fituar gjithnjë e më shumë mbështetje.
Ministri grek i Migracionit, Thanos Plevris, ka mbështetur një politikë të rreptë ndaj mbërritjeve të emigrantëve.
Greqia ka zhvilluar bisedime me Gjermaninë dhe disa vende të tjera të Bashkimit Evropian për krijimin e të ashtuquajturave “qendra kthimi” jashtë bllokut, ku do të shqyrtohen kërkesat e emigrantëve.
