Papa Leoni XIV ka paralajmëruar se përparimi i shpejtë i inteligjencës artificiale mund ta vendosë njerëzimin përballë rrezikut që të humbasë kontrollin mbi teknologjitë që vetë ka krijuar.
Duke folur para anëtarëve të Institutit Ndërkombëtar të Shkencave Administrative, Papa u bëri thirrje studiuesve që të ndihmojnë autoritetet publike të përballen me ndikimin gjithnjë e më të madh të teknologjive digjitale në shoqëri, raportoi të premten Vatican News.
“Shpejtësia me të cilën po zhvillohen inovacionet në inteligjencën artificiale na shtyn të pyesim nëse në të ardhmen do të jemi në gjendje t’i kontrollojmë këto makina dhe nëse njerëzimi rrezikon të bëhet viktimë e shpikjeve të veta”, tha Papa.
Sipas tij, ndikimi i këtyre teknologjive mund të shtrihet në çdo nivel të jetës shoqërore. Për këtë arsye, ai kërkoi vëmendje më të madhe ndaj ruajtjes së rolit të njeriut në proceset e vendimmarrjes.
“Një nga problemet serioze sot është fakti se vendimet që lidhen me jetën njerëzore po u besohen makinave”, paralajmëroi Papa Leoni XIV.
Ai vlerësoi përpjekjet për të riafirmuar “natyrën e pazëvendësueshme të inteligjencës njerëzore” përballë zhvillimeve teknologjike dhe bëri thirrje për krijimin e një kuadri të qartë etik për zhvillimin dhe përdorimin e inteligjencës artificiale dhe teknologjive të tjera digjitale.
Papa theksoi gjithashtu se këto teknologji po përqendrohen gjithnjë e më shumë në duart e aktorëve të mëdhenj ekonomikë dhe teknologjikë, ndërsa qeveritë po hasin vështirësi në ushtrimin e një mbikëqyrjeje efektive.
Mesazhi i tij ishte i qartë: zhvillimi i inteligjencës artificiale duhet të shoqërohet me përgjegjësi, mbikëqyrje dhe ruajtjen e rolit qendror të njeriut në vendimet që prekin jetën dhe shoqërinë.
