“Odyssey” i Christopher Nolan ka vendosur një rekord të ri për Universal, duke u bërë filmi me fitimet më të larta në historinë e studios.
Në fundjavën e nëntë të shfaqjes në kinema, filmi ka kaluar shifrën rekord prej 1.67 miliardë dollarësh të arkëtuar globalisht nga “Jurassic World” në vitin 2015.
Sipas “The Wrap”, suksesi në arkë i shtohet një serie rekordesh të vendosura nga filmi i Nolan. “Odyssey” ka shënuar gjithashtu hapjen më të madhe në karrierën e regjisorit, ka kaluar rekordin e “The Dark Knight Rises” për një film me vlerësim R dhe është bërë filmi me të ardhurat më të larta në historinë e Imax.
Filmi është gjithashtu prodhimi i parë që nuk është vazhdim apo ribërje, që nga “Avatar” në fillim të vitit 2010, që ka kaluar 1 miliard dollarë në arkëtimet jashtë Amerikës së Veriut.
“Ajo që Chris dhe Emma Thomas kanë krijuar do të mbetet në histori si një nga filmat më ambiciozë dhe të realizuar mirë në historinë e kinemasë. Një ngjarje që prek një brez të tërë dhe forcon interesin e audiencës për vetë kinemanë”, deklaroi Donna Langley, presidente e NBCUniversal Entertainment.
“Odyssey” shënon vijimin e bashkëpunimit të suksesshëm mes Nolan dhe Universal. Marrëdhënia mes tyre nisi pesë vjet më parë, pasi regjisori i dha fund bashkëpunimit dhjetëvjeçar me Warner Bros. dhe iu bashkua Universal për realizimin e filmit biografik “Oppenheimer”.
Filmi, me Matt Damon në rolin e Odiseut, u shfaq premierë në kinematë greke më 16 korrik. I bazuar në poemën epike të Homerit, “Odyssey” ndjek udhëtimin dhjetëvjeçar të heroit grek dhe përpjekjet e tij për t’u kthyer në Itakë.
Së bashku me “Spider-Man: Brand New Day” të Sony/Marvel, “Odyssey” ka dominuar gjysmën e dytë të sezonit veror, duke u renditur i dyti ndër filmat me fitimet më të larta të verës.
