Kryeministri Albin Kurti në një konferencë për media ka folur për reagimin e presidentit të Serbisë, Aleksandar Vuçiç lidhur me vendimin e fundit të Qeverisë së Kosovës për vendosjen e reciprocitetit me Serbinë për çështjen e targave.
Kurti tha se nuk e ka ndjekur plotësisht deklaratën e Vuçiçit, por tha se ka vërejtur inat dhe vrer që nuk e ndal pershkallezimin e situatës.
“Nuk e kam ndjekur të plotë deklarimin e presidentit të Serbisë. Cilësimet për veprimet tona nuk janë shumë të drejta. Vrejta që ka shumë inat, shumë vrer që nuk i kontribuon deeskalimit të situatës. Nuk e di se për çfarë masash të Serbisë ndaj Kosovës e ka fjalën, por besoj që Kosova dhe Serbia duhet të ndërtojnë marrëdhënie të mira fqinjësore duke u bazuar ne interesat e përbashkëta si dhe në vlerat evropiane”, tha Kurti.
Ai më pas shprehu keqardhje për qytetarët që detyrohen të pajisen me targa të përkohshme RKS.
Presidenti i Serbisë, Aleksandar Vuçiç, dje i është drejtuar publikut serb pas mbledhjes së Këshillit të Sigurisë Kombëtare në Beograd. Vuçiq tha se Serbia kërkon tërheqjen e të gjitha trupave që po qëndrojnë në veri të Kosovës si dhe një përgjigje urgjente nga BE -ja për situatën. Ai po ashtu tha se kishte marrë një propozim për zgjidhjen e situatës në pikat kufitare në Jarinje dhe Bërnjak dje, por se e refuzoi atë propozim, duke e quajtur poshtërues për Serbinë.
