Donald Trump ka fituar lehtësisht zgjedhjet paraprake të republikanëve në shtetin amerikan të Nevadës, duke rritur epërsinë e tij në garën për nominim nga partia për presidencialet e nëntorit në Shtetet e Bashkuara. Kjo është fitorja e tretë dhe e njëpasnjëshme e miliarderit të papërvojë në politikë, pas triumfeve në Nju-Hempshër dhe në Karolinën e Jugut. Trump ka marrë dyfish më shumë vota sesa pasuesi me i afert, senatori nga Florida, Marco Rubio. Senatori nga Teksasi, Ted Cruz, ka zënë vendin e tretë. Nevada, një shtet zakonisht i luhatshëm me një popullsi të konsiderueshme latine, është vendimtare në procesin zgjedhor. Në zgjedhjet paraprake të demokratëve mbajtura të shtunën në këtë shtet ka fituar ish-sekretarja e Shtetit, Hillary Clinton.