Arturo Vidal u largua gjatë muajit korrik nga Flamengo, por jo nga kampionati brazilian. Pasi firmosi me Athletico PR. Mesfushorit nga Kili i mungon Champions League, kompeticion ku ka luajtur prej vitesh. Duelet e forta mes skuadrave europiane nuk i humbet, gjithsesi. “Ish”i i skuadrave si Juventus, Inter, Bayern e Barcelona, nuk është përmbajtur aspak në analizën e takimeve të mesjavës. “Milan-Newcastle ishte ndeshja më e shëmtuar në historinë e Champions League. Jo si ajo mes Portos dhe Shakhtarit, një sfidë madhështore.
Ata idiotët e Milanit, kundër Newcastle më bënë të ndihesha keq, më zhgënjyen. Janë me fat sepse dinë vetëm të vrapojnë, përndryshe nuk do të ishin aty. Nuk arrij ta kuptoj Newcastle. E mbyllën Premier League në vendin e katërt, por nuk bëjnë asgjë. Fare! Ta neveritin. Ata duhet të rrezikojnë jetën e tyre nëse është ndeshja e parë në Champions, të tregojnë diçka më shumë. Ma hoqën trurin”, thekson 36-vjeçari. I cili nuk ndalet me kaq: “City është i mërzitshëm, si gjithmonë. PSG-Dortmund? Më pëlqeu vetëm pjesa e dytë. Në të parën më zuri gjumi”.
