Tentativat për trafikim droge janë zhvendosur në vendet fqinje të Shqipërisë. Kështu u shpreh Komandanti i Përgjithshëm i Guardia di Finanza-s, Gjeneral Giorgio Toschi gjatë një takimi që pati me ministrin e Brendshëm Fatmir Xhafaj.
Në njoftimin e Ministrisë së Brendshme thuhet se, "Toschi konfirmoi zhvendosjen e tentativave për trafikim, në shtetet fqinje të Shqipërisë dhe shprehu interesin e GdF që, në të ardhmen, të shtrijë monitorimin ajror edhe drejt këtyre vendeve."
Duke u ndaluar në rezultatet konkrete, ai tha se ato të vitit 2018 janë tejet entuziaste sidomos duke pasur parasysh se këtë vit është shtuar numri i orëve të fluturimit, mbulohet një pjesë më e madhe e territorit dhe është rritur gjithashtu hapësira kohore gjatë së cilës është kryer monitorimi ajror.
Komandanti i GdF-së nënvizoi se gjatë këtij viti, në territorin shqiptar janë mbjellë një numër edhe më i vogël bimësh kanabisi se në vitin 2017, që ishte viti më i suksesshëm në luftën kundër kanabisit.
Nga ana e tij, ministri Fatmir Xhafaj duke e falënderuar për asitencën që i ka dhënë në luftën kundër këtij fenomeni, tha se kjo ndihmë mishërohet në dy fusha, kontrollin e kufirit detar dhe monitorimin ajror në kuadër të programit të Ministrisë së Brendshme Italiane e asistuar edhe nga projekti i BE, SANCAS.
Xhafaj theksoi më tej se për Qeverinë shqiptare lufta ndaj kultivimit mbetet një prioritet i qartë politik dhe kombëtar. Ai e ilustroi këtë me masat e marra për të çrrënjosur përfundimisht nga territori shqiptar fenomenin e mbjelljes së bimëve narkotike, i shoqëruar me rezultate solide për të dytin vit radhazi, thuhet në njoftimin e Ministrisë.
