Skënderbeu do të luajë nesër një transfertë të vështirë në Durrës. Në “Niko Dovana”, kampionët e vendit në fuqi do të kenë jo pak punë me vendësit e Teutës, një skuadër me paraqitje mbresëlënëse në këtë kampionat. Si “paradhomë” e përplasjes direkte me Partizanin, për kreun e Superiores, sfida e së nesërmes, në orën 17:00, mbart në vetvete mjaft enigma dhe ngërthen interesim të madh. “Fitorja” e parë, edhe pse bazohej në rregulloren e bregdetarëve ishte mosshtyrja e ndeshjes për të hënën, që t’i jepej kështu mundësi kundërshtarit edhe për 24 orë pushim, pas përmbyllëse të Ligës së Europës, fazës së grupeve, që Skënderbeu e luajti të enjten me Lokomotivën e Moskës. Kuqebardhët nuk mund ta harrojnë ndeshjen e fazës së parë në Korçë, kur Magani dhe të tijtë do t’u bënin “pit stop”-in e parë në këtë kampionat. Barazimi 2-2 i shkaktoi Skënderbeut “shkarjen” e parë, nga tri të tilla (1 barazim dhe 2 humbje) deri tani, në prag të javës së 16-të të Superiores. A do të bëhet sërish pengesë për të? Këtë mbetet ta tregojë fusha e blertë.

Magani thotë se pret kthesën e të tijve, pas humbjes së fundit në Ballsh. “Jemi përgatitur gjatë tërë javës për të zhvilluar një ndeshje të mirë dhe rezultative. Humbja që pësuam në Ballsh na tronditi pak, por gjithçka mund të harrohet shpejt me një fitore ndaj kampionëve. Deri tani jam i kënaqur nga paraqitja e lojtarëve, por kërkoj edhe një sforco të fundit prej tyre, që ta mbyllim sa më mirë vitin 2015, mundësisht në vendin e tretë. E dimë se çfarë potenciali ka kundërshtari, por kjo nuk na tremb. Edhe në fazën e parë treguam se çfarë mund të bëjmë, kur morën atë barazim 2-2 në Korçë. Luajmë në fushën tonë dhe shpresoj shumë të rikthehemi te fitorja. Nuk na interesojnë pretendimet e Skënderbeut, sepse kemi objektivat tona”, thotë trajneri peqinas i durrsakëve.

Dhjetë ndeshjet e fundit mes Teutës dhe Skënderbeut:

16/10/15 SKËNDERBEU 2 – 2 TEUTA

02/05/15 SKËNDERBEU 4 – 2 TEUTA

28/02/15 TEUTA 0 – 1 SKËNDERBEU

06/12/14 SKËNDERBEU 3 – 2 TEUTA

27/09/14 TEUTA 2 – 0 SKËNDERBEU

26/04/14 TEUTA 2 – 1 SKËNDERBEU

17/02/14 TEUTA 1 – 1 SKËNDERBEU

19/10/13 SKËNDERBEU 1 – 1 TEUTA

30/03/13 SKËNDERBEU 0 – 0 TEUTA

21/10/12 TEUTA 0 – 2 SKËNDERBEU