Policia e Shtetit ka ndërmarrë një sërë veprimesh operacionale në qytetet Durrës, Shijak dhe Kavajë, të cilat kanë rezultuar në arrestime dhe procedime penale ndaj disa shtetasve për vepra të ndryshme penale.
Në Durrës, specialistët për Hetimin e Narkotikëve arrestuan shtetasin E. T., 36 vjeç, pasi gjatë kontrollit fizik iu gjetën dhe iu sekuestruan sasi të dyshuara të lëndëve narkotike kokainë dhe heroinë.
Ndërkohë, në Shijak, specialistët për Hetimin e Krimeve arrestuan në flagrancë shtetasin M. G., 62 vjeç, pasi theu masën e sigurisë “Arrest në shtëpi”, duke shkelur vendimin e gjykatës.
Në Kavajë, janë referuar materialet në Prokurori për shtetasit P. Ç. dhe R. Rr., të cilët janë proceduar në gjendje të lirë pas një konflikti për motive të dobëta.
Materialet procedurale janë dërguar në Prokurorinë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme hetimore.
