Një i ri nga Elbasani është proceduar penalisht pasi tentoi të korruptojë një efektiv të Policisë Rrugore në Harizaj, Kavajë, për të shmangur një gjobë.
28-vjeçari u ndalua me automjet me xhama të zinj dhe në momentin e kontrollit i ofroi para punonjësit të Policisë.
Njoftimi i Policisë:
Kavajë
Tentoi të korruptonte punonjësin e Policisë Rrugore, për të shmangur masën administrative për shkelje të rregullave të qarkullimit rrugor, procedohet penalisht 28-vjeçari.
Gjatë monitorimit të akseve rrugore, me qëllim parandalimin e aksidenteve dhe përmbushjen e parametrave të sigurisë në rrugë, shërbimet e Policisë Rrugore të Kavajës kanë ndaluar në fshatin Harizaj, drejtuesin e një automjeti me xhama të riveshur. Në momentin e ndalimit, ai i ka ofruar para punonjësve të Policisë, për të shmangur ndëshkimin me masë administrative për shkeljen e kryer.
Në vijim të veprimeve, u referuan materialet në Prokurori ku nisi procedimi në gjendje të lirë për shtetasin R. Y., 28 vjeç, banues në Elbasan, për veprën penale “Korrupsioni aktiv i personave që ushtrojnë funksione publike”.
Policia Rrugore e Durrësit apelon për të gjithë përdoruesit e rrugës që të zbatojnë në mënyrë rigoroze rregullat e qarkullimit rrugor dhe fton qytetarët që të denoncojnë në numrin 112, çdo shkelje të rregullave të qarkullimit rrugor, duke iu garantuar anonimat të plotë dhe reagim të menjëhershëm nga shërbimet e Policisë.
