Kryetari i Partisë Demokratike, Sali Berisha, në një deklaratë për mediat këtë të hënë, ka cilësuar si një “krim të vërtetë shtetëror” situatën e zjarreve që kanë përfshirë vendin gjatë këtij viti, duke akuzuar qeverinë për papërgjegjshmëri, korrupsion dhe mungesë totale përgatitjeje.
Ai ngriti shqetësimin për pasojat e rënda të zjarreve, duke theksuar se janë djegur mijëra bagëti, qindra mijëra koshere bletësh dhe është shkatërruar tërësisht flora dhe fauna në disa zona të vendit.
“Sot jam para medieve për të denoncuar si një krim të vërtetë shtetëror zjarret, flakët dhe djegiet e mbi 54 mijë hektarë ullishte, kopshte, bahçe, pyje. Djegien e qindra banesave në fshatrat e Gramshit, Delvinës dhe në një seri zonash të tjera. Shqipëria, zjarre të tilla shkatërrimtarë nuk ka njohur ndonjëherë. Pati viktima, pati të djegur, të plagosur. Shqiptarët u ndjenë më të braktisur se kurrë.” –tha Berisha.
Në deklaratën e tij, Berisha shprehu solidaritet me të gjithë të dëmtuarit dhe dënoi zjarrvënësit.
“Dënoj me forcën më të madhe të gjithë ata individë të cilët kryen krimin e shëmtuar të zjarrvënies. Ata meritojnë ndëshkimin ligjor më të madh.”-vijoi mw tej Kreu i PD-sw.
Sipas tij, përgjegjësia kryesore bie mbi qeverinë, e cila është përpjekur ta mbulojë situatën me propagandë.
“Dënoj si një krim shtetëror propagandën e neveritshme, mashtruese të narkoqeverisë, e cila bënte fjalë për dhjetëra mijëra forca të angazhuara, në një kohë kur nga fusha e betejës gazetarët informonin se atje numëroheshin me gishtërinjtë e duarve zjarrfikësit apo forcat e tjera në shuarjen e zjarreve.” -tha mw tej Berisha.
Berisha i cilësoi zjarret si një pasojë direkte e keqqeverisjes dhe mungesës së investimeve në sistemin e mbrojtjes civile.
“Shkatërrimet e zjarreve këtë vit janë një krim i vërtetë shtetëror, për arsye se në mënyrë të papërgjegjshme për shkak të korrupsionit, vjedhjes, indiferencës dhe injorancës, Shqipëria u gjet e çarmatosur tërësisht nga mjetet antizjarr.”- tha Berisha.
