Policia Rrugore referoi materialet në Prokurori për disa shtetas të konstatuar duke drejtuar mjete pa leje drejtimi në zona të ndryshme të Durrësit.
Një 23-vjeçar dhe një 26-vjeçar u kapën duke drejtuar automjet dhe motomjet pa patentë, ndërsa në rrugën e Gjiri i Lalzit një automjet u përplas me një motomjet që drejtohej pa leje, duke lënë të dëmtuar drejtuesin e motomjetit, i cili ndodhet jashtë rrezikut për jetën.
Po ashtu, në rrugën “Vllazërimi”, një automjet përplasi një biçikletë, duke plagosur drejtuesin e saj, i cili po merr ndihmë mjekësore në Spitalin e Traumës.
Njoftimi i plotë:
Specialistët për qarkullimin rrugor referuan materialet në Prokurori, ku nisi procedimi penal për shtetasit:
-F. D., 23 vjeç, banues në Durrës, pasi është konstatuar në lagjen nr. 13, duke drejtuar automjetin, pa leje drejtimi;
-E. Gj., 26 vjeç, banues në Durrës, pasi është konstatuar në rrugën “Pavarësia”, duke drejtuar motomjetin, pa leje drejtimi;
-A. H., 35 vjeç, banues në Manëz dhe Sh. B., 67 vjeç, banues në Jubë, pasi në rrugën e Gjirit të Lalzit, automjeti që drejtohej nga shtetasi A. H. është përplasur me motomjetin që shtetasi Sh. B. e drejtonte pa leje drejtimi. Si pasojë është dëmtuar shtetasi Sh. B., i cili ndodhet në spital, jashtë rrezikut për jetën;
-Q. M., banues në Durrës, pasi në rrugën “Vllazërimi”, duke drejtuar automjetin, ka përplasur biçikletën me të cilën lëvizte shtetasi G. S. Si pasojë është dëmtuar shtetasi G. S., i cili po merr ndihmë mjekësore në Spitalin e Traumës.
