Rruga nga Kavaja në Durrës është përballur pasditen e sotme me trafik të dendur për shkak të aksidentit në të cilin mbeti i përfshirë një trajler. Aksidenti ka ndodhur pranë Golemit.
Qindra automjete presin në radhë prej shumë minutash tashmë, ndërsa në vendngjarje ndodhen forcat e policisë për të normalizuar qarkullimin e mjeteve. Fatmirësisht nuk raportohet për jetë të humbura.
Policia njofton se për shkak se spostimi i trajlerit do të kërkojë kohë, “shoferët që duan të qarkullojnë në drejtim të Tiranës, të përdorin rrugën Rrogozhinë –Elbasan-Tiranë ose rrugë dytësore alternative”.
Njoftimi i policisë:
Në aksin rrugor Kavajë-Durrës, në dalje të Kavajës, është batuar një trajler, pa shkaktuar probleme në njerëz, por vetëm me dëme materiale dhe për pasojë është bllokuar lëvizja e automjeteve.
Nisur nga fakti se trajleri është i tonazhit të rëndë dhe për ta lëvizur nga rruga duhet kohë, pasi po shkon në vendngjarje një mjet i tonazhit të rëndë, Policia e Shtetit iu bën thirrje të gjithë drejtuesve të automjeteve që duan të qarkullojnë në drejtim të Tiranës, të përdorin rrugën Rrogozhinë –Elbasan-Tiranë ose rrugë dytësore alternative.
Shërbimet e Policisë janë në detyrë dhe po punojnë intensivisht për zhbllokimin e rrugës dhe për të orientuar drejtuesit e automjeteve për të qarkulluar në rrugë alternative dytësore ose në rrugën Rrogozhinë-Elbasan-Tiranë.
