Ujërat e zeza derdhen mbi mozaik. Ky është realiteti i trishtë në kantierin e ndërtimit të shkollës së mesme “Gjergj Kastrioti”, ku ekipi i “DurrësLajm” pa nga afër situatën e krijuar aty.
Ashtu siç raportuam një ditë më parë, pikërisht në vendin ku u zbulua muaj më parë mozaiku me figura gjeometrike dhe floreale që i përket fundit të shekullit të I dhe fillimit të shekullit të II, prania e ujërave të zeza është mjaft evidente. Madje dhe gjelbërimi aty është më i pranishëm se kudo tjetër.
Në kantierin e ndërtimit, përfaqësues të firmës prisnin që nga mëngjesi një grup nga bashkia Durrës dhe SHRUKD për t’i njohur nga afër me situatën.
Jashtë kamerës, ata deklaruan se shpërthimi i ujërave të zeza në kantier ndodh për shkak të bllokimit të pusetave nga dherat, që kanë rrëshqitur prej kodrës, në ditët me shi.
Sipas tyre, ndërhyrja për zhbllokimin e pusetave dhe sistemimin e rrjetit të kanalizimeve duhet bërë me mjete të rënda, por aktualisht ata e kanë të pamundur të punojnë, sepse që nga tetori i vitit të kaluar punimet janë pezulluar pas zbulimit të sitit të rëndësishëm arkeologjik në gropën e themeleve të gjimnazit.
Rredhja e pandërprerë e ujërave të zeza rrezikon seriozisht sitin arkeologjik dhe mund të vështirësojë punën që pritet të nisë për zbulimin e plotë të mozaikut dhe gjithçkaje tjetër që nëntoka e kësaj zone mund të fshehë.
Njëkohësisht, e gjithë zona rrezikon të kthehet në vatër infeksioni me rritjen e temperaturave. Kantieri rrethohet nga pallate shumëkatëshe, të banuar nga një numër i konsiderueshëm familjesh.
Mozaiku i zbuluar në muajin tetor është i përbërë nga gurë ngjyrë blu të errët dhe të bardhë dhe mendohet se është pjesë e një vile luksoze që ndodhej pranë amfiteatrit të Durrësit. Nga ai janë zbuluar vetëm disa pjesë, pasi mendohet të ketë një sipërfaqe rreth 60 metër katror. Aktualisht mozaiku është i mbuluar për ta ruajtur nga ndikimet atmosferike.
Gjatë marsit të këtij viti, bashkia Durrës mbylli procedurat e tenderit për gërmimet e shpëtimit, për të cilat janë akorduar 13,811,500 lekë.
Gërmimi do të kryhet deri në thellësinë që kërkohet nga projekti 6.75 m.
M.B.