Marina turistike e Durrësit është tashmë realitet dhe jo vetëm projekt në letër.

Në hapësirën portuale, ku janë projektuar të ndërtohen dy godinat e para për të cilat Këshilli Kombëtar i Territorit ka dhënë lejen 2 muaj më parë, mjetet e rënda kanë bërë gati sheshin e ndërtimit.

“DurrësLajm” po ju sjell pamje filmike nga ajo që deri në fund të muajit korrik ishte pjesë e Terminalit Lindor të portit të Durrësit, dhënë me koncesion kompanisë gjermane “EMS APO”, por që tashmë është shndërruar në shesh ndërtimi për dy godinat e para shumëkatëshe të projektit 2 miliardë euro “Durrës Marina”.

Mesditën e sotme, mjetet e rënda po punonin me intensitet të ulët, ndërkohë që në kantier janë vendosur edhe tabelat me 2 lejet përkatëse të ndërtimit dhënë nga KKT, në fillim të muajit gusht.

(Leja e Ndërtimit dhënë nga KKT: për objektin: “Godinë banimi dhe shërbimi me 1, 6, 7, 8 dhe 10 kate mbitokë, 1 kat pjesërisht parkim nëntokë dhe 1 kat parkim nëntokë” dhe “Godinë banimi dhe shërbimi 1, 6, 7 dhe 8 kate mbitokë, 1 kat pjesërisht parkim nëntokë dhe 1 kat parkim nëntokë”, Zona 02, Zona e menaxhimi A02 dhe A04, me vendndodhje në “Marina & Jahtet e Durrësit”, me subjekt zhvillues shoqërinë “Durrës Marina” sh.a).  

E ndërsa projekti “Durrës Marina” i biznesmenit nga Emiratet e Bashkuara Arabe Mohamed Alabbar ka nisur të realizohet në terren, e njëjta gjë nuk mund të thuhet për projektin e portit të ri të Durrësit, i projektuar për t’u ndërtuar në Porto Romano.

Territori ku aktualisht është shtrirë projekti “Durrës Marina” ishte deri më 29 korrik të këtij viti pjesë e koncesionit 35-vjeçar, që kompania gjermane EMS ka lidhur me shtetin shqiptar.

Mëngjesin e 29 korrikut, autoritetet portuale ndërhynë me forcë në terminalin lindor, duke “zaptuar” një pjesë të territorit, që siç duket edhe në pamjet filmike është i rrethuar me kangjella të hekurta dhe blloqe betoni.

Kompania EMS vazhdon ushtron aktivitetin, por në një territor më të kufizuar, ndërkohë që tashmë është zhvilluar në Uashington seanca e parë në Gjykatën e Arbitrazhit mes kompanisë koncesionare gjermane dhe shtetit shqiptar.

Fatura financiare e dëmshpërblimit e kërkuar në Arbitrazh për trajtim të pabarabartë dhe diskriminues nga kompania gjermane EMS APO është në vlerën 40 milionë euro. 

M.B.