Fëmijët e çiftit Marku kanë mbërritur në Lezhë dhe njërit prej tyre i është dhënë ndihmë shëndetësore pasi rezulton se ka qenë sëmurë.
Ndërkohë e ëma e fëmijëve Bardha Marku 32 vjeçe deklarohet se është nisur dhe pritet të mbërrijë pranë tyre.
Ngjarja e rëndë ndodhi këtë mëngjes, ku babai kishte marrë peng dy fëmijët e tij në një shtëpi me qira në zonën e Shkëmbit të Kavajës. Kur forcat RENEA shkuan për të shpëtuar fëmijët e mitur, 40-vjeçari Aleks Marku qëlloi drejt tyre me kallashnikov. Pas disa orësh negociata, RENEA dhe policia arritën të nxirrnin fëmijët nga shtëpia, ndërsa babai u vu nën prangat e policisë.
Paraprakisht dyshohet se ky akt është kryer pasi ka qenë nën efektin e drogës dhe po hetohen të gjithë elementet e deritanishme për të zbardhur motivin e marrjes peng të fëmijëve të tij të mitur dhe kundërpërgjigjes me armë ndaj policisë.
Konfliktet brenda familjes dhe largimi i gruas jashtë vendit është pista kryesore që po vlerësohet nga grupi hetimor për ngjarjen e rëndë në Durrës.
