Këtë vit të ri shkollor që nis më 11 shtator, mijëra nxënës të shkollave dhe vogëlushë të kopshteve të Durrësit nuk do të mund të ndjekin procesin mësimor në institucionet e tyre arsimore.
Për të katërtin vit radhazi pas tërmetit, nxënësit e 8 shkollave dhe kopshteve do të zhvillojnë mësimin në shkolla të tjera pritëse, pasi rikonstruksioni apo rindërtimi i godinave nuk ka përfunduar ende.
Programi “BE për Shkollat”, i cili financohet nga Bashkimi Evropian dhe zbatohet nga Programi i Kombeve të Bashkuara për Zhvillim (UNDP) në bashkëpunim me qeverinë shqiptare, mori përsipër riparimin/rindërtimin e 18 objekteve arsimore sipas standardeve evropiane, duke ofruar kushte më të mira arsimore për 7,229 nxënës, fëmijë dhe mësues.
“Deri më tani punimet civile kanë përfunduar në 8 objekte arsimore”,– bëri të ditur për “DurrësLajm”, zyra e shtypit pranë UNDP. Përfitues janë 3,393 nxënës, fëmijë dhe mësues.
Objektet arsimore të përfunduara:
- Shkolla e Mesme Profesionale “Hysen Çela”;
- Kopshti “1 Qershori”;
- Kopshti “Ismet Nanushi”, Kullë, Sukth;
- Shkolla e Mesme e Bashkuar “Ismet Nanushi”, Kullë, Sukth;
- Shkolla e Mesme “Dhosi Liperi”, Sukth;
- Shkolla e Mesme “Olsi Lasko”;
- Çerdhja Nr. 3; dhe
- Çerdhja Nr. 2.
![](https://durreslajm.al/app/uploads/2023/08/shkolla-2-1024x576.jpg)
Nga gjimnazet e qytetit që u përfshinë në programin e rindërtimit, vetëm “Olsi Lasko” do të jetë gati për të pritur nxënësit në fillim të muajit shtator.
![](https://durreslajm.al/app/uploads/2023/08/shkolla-1-1024x576.jpg)
![](https://durreslajm.al/app/uploads/2023/08/shkolla-1024x576.jpg)
Ndërkohë vijojnë punimet tek gjimnazet kryesore si “Gjergj Kastrioti” dhe “Naim Frashëri”, por edhe në shkollën e mesme sportive “Bernardina Qerraxhia”.
Këto shkolla të mesme janë mes godinave arsimore ende të papërfunduara.
- Shkolla 9 – vjeçare dhe kopshti “Eftali Koci”;
- Shkolla 9 – vjeçare “14 Nëntori”;
- Shkolla e Mesme “Naim Frashëri”;
- Shkolla e Mesme “Gjergj Kastrioti”;
- Kopshti Bizë, Ishëm;
- Kopshti Kuçok, Manëz;
- Shkolla e Mesme Profesionale “Bernardina Qerraxhia”;
- Konvikti “Bernardina Qerraxhia”
![](https://durreslajm.al/app/uploads/2023/08/shkollat-ok.png)
Për shkak të tërmetit të 26 nëntorit 2019 dhe ecurisë së procesit të rindërtimit, me mijëra nxënës të gjimnazeve të qytetit kanë përfunduar vitet e shkollës së mesme pa studiuar për asnjë ditë të vetme në shkollat e tyre.
Ndërkohë “pritet të nisë përgjatë këtij muaji procesi i rindërtimit në konviktin e shkollës profesionale “Beqir Çela””,– bën të ditur UNDP, ndërsa thekson se “për shkollën 9 – vjeçare “Riza Shera”, Radë, Manëz vijon procesi i përgatitjes së projektit teknik.”
Viti shkollor 2024-2025 pritet të jetë viti i parë, kur nxënësit e Durrësit nuk do të studiojnë më në shkolla pritëse, pasi sipas UNDP, “procesi i riparimit/rindërtimit të objekteve arsimore pritet të përfundojë brenda muajit qershor 2024”.
M.B.