Rinovimi i kontratës së trajnerit Diego Pablo Simeone me Atleticon e Madridit tani është një realitet. Kontrata e argjentinasit shtyhet tashmë me dy vjet duke qënë e vlefshme deri në 30 qershor të vitit 2020.
Kjo konfirmon edhe njëherë harmoninë që ekziston mes drejtuesve të ekipit dhe teknikut. Ky është sezoni i shtatë në stolin e Los Colchoneros për El Cholo, që automatikisht klasifikohet si tekniku me jetëgjatësinë më të madhe në drejtimin e një klubi të La Ligas.
Vetëm Arsene Wenger e superon Simeonen në qëndrimin e tij në një tjetër stol elitar të futbollit europian, sic është ai i Arsenalit.
Simeone mori drejtimin e Atleticos në dhjetor të vitit 2011 dhe që nga ai moment nën drejtimin e tij, klubi madrilen ka fituar 5 trofe: atë të Europa League në vitin 2012, Superkupën e Europës po në 2012, Kupën e Mbretit në 2013, titullin kampion të La Ligas në sezonin 2013-14 si dhe atë të Superkupës se Spanjës në 2014, gjithashtu bardhekuqtë numërojnë dhe dy finale të luajtura në Champions League në vitin 2014 dhe 2016.
