Reperi i njohur Stresi ka bërë një dedikim emocionues për gjyshërit e tij, ku shprehet se edhe pse i rëndon pesha e viteve, i lutet Zotit që t’i lejojë të qëndrojnë sa më gjatë me të.
Përmes një postimi në rrjete sociale, Stresi iu bën thirrje ndjekësve që të mos i harrojnë gjyshërit.
“Distanca që krijohet mes njerëzve dhemb, ndarja dhemb, por ajo që dhemb akoma më shumë është të shohësh njerëzit që do, të plaken në moshë dhe t’i thuash vetes se një ditë ata nuk do të jenë më.
Oh sa dhemb. Unë i shoh ata gjithnjë e më rrallë dhe çdo herë situata është e njëjtë. Pesha e viteve po i rëndon. Tiparet e tyre po humbasin rininë. Hapat dhe lëvizjet e tyre ngadalësohen. I shoh dhe nuk jam në gjendje të bëj asgjë. Thjesht dëshmi pasive për moshën që i konsumon duke u lutur çdo ditë që Zoti do t’i lërë me mua për shumë vite në vazhdim.
E di, një ditë do të na duhet të përballemi me faktet dhe të pranojmë fatin që është i destinuar për të gjithë ne. Por jo tani. Akoma jo. Kam nevojë për ata. I dua shumë. Gjyshërit e mi. Balsami i shpirtit tim. Ju lutem mos i harroni gjyshërit e gjyshet”, ka shkruar Stresi.
