Festat e fundvitit kanë shtuar fluksin e lëvizjeve në portin më të madh në vend.
Ndërsa po afron festa e Krishtlindjes dhe Vitit të Ri, të shumtë kanë qenë emigrantët shqiptarë që janë rikthyer në atdhe për t’i kaluar së bashku me familjarët e tyre këto ditë pushimi.
“DurrësLajm” mëson se mëngjesin e sotëm, në portin e Durrësit kanë mbërritur 4536 pasagjerë me 3 tragetet e linjës Bari – Durrës dhe Ankona – Durrës, ndërsa në dalje janë 1157 pasagjerë.
Gjithësesi këto nuk janë shifrat përfundimtare për këtë të dielë, pasi në darkë pritet mbërritja e 2 trageteve të tjerë nga Bari.
Kujtojmë se duke nisur nga data 19 dhe deri ditën e sotme, kur data shënon 22 dhjetor, tragetet që lidhin portin e Durrësit me portet italiane kanë kryer lundrime të dyfishta çdo ditë, për të përballuar fluksin e udhëtarëve që kërkonin të ktheheshin në Shqipëri.
Në funksion të përpunimit të shpejtë të udhëtarëve dhe mjeteve të tyre autoritetet portuale kanë vënë në dispozicion 30 sportele.
Fluksi i pasagjerëve përgjatë këtyre ditëve pritet të jetë rreth 10% më i lartë krahasuar me të njëjtën periudhë të një viti më parë, por gjithsesi shumë më i ulët sesa në periudhën e sezonit veror.
Në periudhën janar-nëntor të këtij viti në portin e Durrësit janë përpunuar 716.214 pasagjerë nga të cilët 337 324 në hyrje dhe 378. 890 në dalje.
M.B.
