Deputeti i Durrësit, Igli Cara, ka reaguar lidhur me vendimin për vendosjen e parkimeve me pagesë në rrugët e qytetit, duke e cilësuar atë si një masë të padrejtë për qytetarët.
Sipas Carës, Bashkia e Durrësit po vendos tarifa të reja në një kohë kur problematikat infrastrukturore vazhdojnë të mbeten të pazgjidhura.
Ai thekson se mungesa e vendeve të parkimit për banorët, rrugët e amortizuara, trotuaret e dëmtuara dhe pusetat e hapura janë shqetësime që kërkojnë zgjidhje të menjëhershme.
Postimi i plotë:
Absurdi i Bashkisë së Durrësit
Pa shërbime, pa rrugë, pa parkime për rezidentët bashkia e Durrësit vendos të faturojë këdo për të parkuar automjetet.
Praktika e parkimeve kundrejt pagesës nuk është e panjohur në botë.
Por, në Durrës ndodh çudia!
Shërbimet harrohen, ndërsa taksat shtohen!
Pa konsultim me qytetarët, pa zgjidhje për problematikat dhe në kulmin e sezonit turistik!
A nuk duhej të kishte përfunduar rruga e hyrjes së qytetit të Durrësit?
Po trotuaret ku mund të rrëzohesh, po pusetat e hapura dhe gropat e harruara në rrugë e trotuare?
Durrësi po bëhet dita-ditës i pajetueshëm!
Ky është realiteti me të cilin përballemi të gjithë!
