Sot është data e fundit për të gjitha firmat e interesuara për të dorëzuar dokumentacionin përkatës për të marrë pjesë në tenderin e rikonstruksionit të galerisë së artit pamor në Durrës.
I hapet kështu drita jeshile rikonstruksionit të të vetmes galeri publike në qytetin bregdetar, e cila prej kohësh ka shfaqur shenjat e degradimit.
Galeria “Nikolet Vasia”, që ndodhet në qendër të qytetit, ka shumë problematika të cilat përfshijnë lagështinë, vizibilitetin, organizimin e brendshëm, sistemin elektrik dhe ndriçimin, sistemin e aspirimit dhe kondicionimit etj.
Uji i shiut ka krijuar shumë lagështi dhe dëmtim në tavanin e gipsit dhe shpeshherë ky ujë binte mbi kokat e artdashëve.
![](https://durreslajm.al/app/uploads/2024/05/Lajme.00_00_09_04.Still143-1024x576-1.jpg)
Shqetësimi për këtë gjendje skandaloze është ngritur edhe nga komuniteti i artistëve durrsakë, që më 2 nëntor 2023 hapën një ekspozitë proteste.
![](https://durreslajm.al/app/uploads/2024/05/Lajme.00_03_56_11.Still148-1024x576.jpg)
“Sado të jetë e bukur të jetë piktura, në këto mure kaq të pista, me gozhda të shtrembëta, me këtë tavan kaq katastrofë nuk e di sesi këto vepra rrinë dhe duken bukur, me gjithë këtë situatë”,– deklaroi në atë kohë për “DurrësLajm” kuratorja Marjana Goxhabelliu.
Bashkia e Durrësit ka vënë në dispozicion rreth 10 milionë lekë për rikonstruksionin e galerisë së artit pamor.
Projekti përfshin disa ndërhyrje duke filluar nga prishjet e suvatimeve, hidroizolimi i taracës, sistem i ri elektrik, aspirimi dhe kondicionimi etj.
![](https://durreslajm.al/app/uploads/2024/05/galeria-2.png)
Në aspektin e organizimit të brendshëm, do të bëhet spostimi i hyrjes kryesore, ku do të organizohet dhe një recepsion së bashku me postin përkatës të punës dhe një ambient pritje.
![](https://durreslajm.al/app/uploads/2024/05/galeria.png)
Punimet pritet të zgjasin 49 ditë, pas shpalljes së fituesit të tenderit dhe lidhjes së kontratës me bashkinë.
M.B.