Një 44-vjeçar nga fshati Pjezë i Njësisë Administrative Xhafzotaj është arrestuar nga Policia e Shijakut, pasi akuzohet se ka kryer marrëdhënie seksuale me dhunë ndaj një 18-vjeçareje që vuan nga probleme të shëndetit mendor. Ngjarja ka ndodhur në një banesë të braktisur në fshatin Pjezë.
Mësohet se në pranga ra shtetasi me iniciale H. G., 44 vjeç.
Gjatë kontrollit në banesën e tij, Policia sekuestroi një shkop gome që përdoret nga shërbimet e rendit, si dhe një armë gjahu që e mbante pa leje.
Njoftimi i plotë:
Shijak
Kreu marrëdhënie seksuale me dhunë me një 18-vjeçare, kapet dhe vihet në pranga autori i dyshuar.
Sekuestrohen një armë gjahu që e mbante pa leje dhe një shkop gome që përdor Policia.
Specialistët për Hetimin e Krimit në Komisariatin e Policisë Shijak, menjëherë pas kallëzimit të marrë për një shtetas që kishte kryer marrëdhënie seksuale me dhunë në një banesë të braktisur në fshatin Pjezë, me një shtetase që vuan nga shëndeti mendor, organizuan punën për kapjen e tij.
Si rezultat, u kap dhe u vu në pranga shtetasi H. G., 44 vjeç, banues në fshatin Pjezë të Njësisë Administrative Xhafzotaj, Shijak.
Gjatë kontrollit të banesës së autorit të dyshuar, Policia gjeti dhe sekuestroi në cilësinë e provës materiale një shkop gome dhe një armë gjahu, të cilën e mbante pa leje të organeve kompetente.
Materialet procedurale i kaluan Prokurorisë së Rrethit Gjyqësor Juridiksionit të Përgjithshëm Durrës, për veprat penale “Kryerja e marrëdhënieve seksuale me dhunë me të rritura, me persona të paaftë për t’u mbrojtur”, “Mbajtje pa leje të organeve kompetente të armëve të gjahut” dhe “Mbajtje pa leje të organeve kompetente të armëve të ftohta”.
