“Gruaja në ritmet e kohës” e kishte titulluar aktivitetin e këtij viti producentja Myzejen Konduri, e cila në prag të festës së 8 marsit shpalli 10 gratë më të suksesshme të vitit në Durrës.
Eventi që këtë vit shënon edicionin e tij të 28-të i përkushtohet grave, të cilat me kontributin e tyre në ekonomi, biznes, administrim, mjekësi e shumë fusha të tjera ndikojnë çdo ditë për një shoqëri më të mirë, më të përgjegjshme dhe më të kulturuar.
Në skenën e QKF-së, secila nga zonjat që u vlerësua me titullin “Gruaja e vitit” rrëfeu më shumë lidhur me profesionin e saj, punën e përditshme dhe vizionin që ato ndajnë për të formuar dhe përcjellë një shembull që duhet ndjekur.
Të pranishme në këtë aktivitet ishin dhe deputetja Eva Budini dhe ish-deputetja Nora Malaj.
Një hapësirë e veçantë gjatë ceremonisë iu rezervua 20 fëmijëve nga shtresat në nevojë të qytetit, të cilëve iu dhurua nga një pako, e mundësuar falë kontributit financiar të 10 grave më të suksesshme të këtij viti.
Në event nuk munguan edhe momentet plot alegri dhe ritëm nën tingujt e hiteve më të njohura të këngëtarëve Mateus Frroku, Xhesika Polo etj.
Kush janë 10 gratë më të suksesshme të vitit:
Merita Muzina – Kontabiliste
Sofjana Xhavo – Stomatologe
Katerina Deliallisi – Mjeke veterinare
Greta Guga – Mjeke psikiatër
Ornela Serusi – Administratore në kompani industriale
Liljana Turku – Biznesmene
Uarda Shehu – Farmaciste
Aida Teliti – Psikologe, lektore
Bianka Salliu – Mjeke e përgjithshme, pediatre
Suzana Ago – Administratore në kompani punësimi
M.B.
