Teuta ka zhvilluar një ndeshje miqësore ndaj Sopotit të Librazhdit në kompleksin “Tropikal”. Ky takim shërbeu kryesisht si test për stafin teknik, i cili pati mundësinë të vlerësojë gjendjen e skuadrës dhe të eksperimentojë me alternativa të ndryshme. Trajneri Enkeleid Dobi ndryshoi qasjen, duke u dhënë më shumë hapësirë lojtarëve që kanë pasur më pak minuta në ndeshjet zyrtare. Ky vendim synon të mbajë të gjithë grupin në ritëm dhe të rrisë konkurrencën e brendshme në këtë fazë të sezonit.
Një aspekt pozitiv ishte aktivizimi i lojtarëve të rinj nga akademia, veçanërisht nga U-17. Ata përfituan nga minuta të rëndësishme dhe treguan cilësi e personalitet, duke lënë sinjale inkurajuese për të ardhmen. Paraqitja e tyre u vlerësua nga stafi, që i konsideron pjesë të rëndësishme të projektit të klubit. Në planin taktik, miqësorja i dha mundësi skuadrës të punojë në organizimin e lojës, qarkullimin e topit dhe fazën mbrojtëse. Dobi provoi disa skema dhe alternativa në repartet kyçe, ndërsa ajo që ra në sy ishte serioziteti dhe angazhimi i lojtarëve në fushë. Pas këtij testi, skuadra pushoi të dielën për rikuperim, si pjesë e menaxhimit të ngarkesës.
Nga e hëna, Teuta nis përgatitjet për ndeshjen e radhës në kampionat ndaj Vorës, një përballje e rëndësishme për objektivat e sezonit. Një lajm i mirë për stafin teknik është rikthimi i pritshëm i disa lojtarëve të rëndësishëm nga angazhimet me përfaqësuesen, konkretisht Arifi dhe Kuqi, të cilët do të shtojnë alternativat dhe cilësinë në skuadër. Me grupin drejt plotësimit dhe një gjendje të mirë fizike e psikologjike, Teuta synon të vijojë me rezultate pozitive në kampionat.
