Dita e katërt e raundit të pestë të bisedimeve të ndërmjetësuara nga Shtetet e Bashkuara mes Izraelit dhe Libanit nisi të premten në Departamentin e Shtetit në Uashington.
Një zyrtar i Departamentit të Shtetit tha se palët janë rikthyer në tryezën e negociatave për të vazhduar punën drejt arritjes së një marrëveshjeje, duke theksuar se Izraeli dhe Libani do të negociojnë si dy shtete sovrane me synimin për të gjetur paqe dhe siguri afatgjatë.
Bisedimet, të cilat fillimisht ishin planifikuar të zhvilloheshin nga 23 deri më 25 korrik, u zgjatën me një ditë për shkak të mosmarrëveshjeve mbi refuzimin e Izraelit për t’u tërhequr nga zonat deri në 8 kilometra brenda Libanit jugor, sipas transmetuesit publik izraelit Kan.
Një zyrtar i lartë libanez deklaroi se Libani kërkon tërheqjen e plotë të forcave izraelite nga i gjithë territori libanez sipas një afati të qartë kohor.
Sipas tij, Bejruti këmbëngul që çdo plan pilot të nisë në zonat e pushtuara nga forcat izraelite brenda Vijës së Verdhë dhe jo në zonat ku nuk ka prani të trupave izraelite.
