Papa ka mbajtur një mesazh të fortë kundër luftës gjatë homelisë së Meshës në Bazilikën e Shën Pjetrit, duke theksuar se konflikti i armatosur nuk mund të justifikohet kurrë moralisht dhe nuk përfaqëson vullnetin e Zotit.
“Lufta nuk është kurrë e denjë për njeriun dhe nuk është kurrë e bekuar nga Zoti, sepse Krijuesi na ka pajisur me inteligjencën dhe vullnetin për të zgjidhur konfliktet si qenie njerëzore dhe jo si kafshë, ndoshta të pajisura me armë hiperteknologjike”, u shpreh ai gjatë predikimit të tij, duke vënë theksin te përgjegjësia morale e njerëzimit për të shmangur dhunën.
Ati i Shenjtë nënvizoi gjithashtu se uniteti i familjes njerëzore qëndron mbi ndarjet politike dhe kombëtare, duke e cilësuar atë si një parim themelor që duhet të udhëheqë marrëdhëniet ndërkombëtare dhe vendimmarrjen globale.
“Uniteti i familjes njerëzore u paraprin popujve dhe shteteve individuale. Nuk është vetëm një fakt biologjik, është një parim etik”, theksoi Papa, duke i bërë thirrje komunitetit ndërkombëtar të rikthejë vëmendjen tek vlerat e solidaritetit dhe bashkëjetesës paqësore.
Fjalimi u mbajt gjatë Meshës që në fakt shënoi hapjen e Koncistorit të Jashtëzakonshëm, një mbledhje e rëndësishme e kardinalëve të Kishës Katolike.
Në vijim të seancës së parë të punës, diskutimet iu kushtuan situatës ndërkombëtare dhe krizave të shumta që po prekin aktualisht botën, me Papa që kërkoi reflektim më të thellë mbi rolin e Kishës dhe të udhëheqësve botërorë në ndërtimin e paqes.
